

D2616

@##། །རྒྱ་གར་སྐད་དུ། ནཱ་མ་སཾ་གཱི་ཏི་སཱ་དྷ་ནཱཾ། བོད་སྐད་དུ། མཚན་ཡང་དག་པར་བརྗོད་པ་ཞེས་བྱ་བའི་སྒྲུབ་ཐབས། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །རེ་ཞིག་དང་པོར་སྒྲུབ་པ་པོ་སྔ་བར་ལངས་ཏེ། གདོང་ལ་སོགས་པ་དག་པར་བྱས་ཏེ། སྒོམ་པའི ཁང་པར་ཞུགས་ཏེ།བདེ་བའི་སྟན་ལ་སྐྱིལ་མོ་ཀྲུང་གིས་འདུག་སྟེ། རང་གི་སྙིང་གར་ཟླ་བ་དང་པདྨ་ལ་མུཿཡིག་དམར་སེར་བསྒོམ་པར་བྱའོ། །དེ་ནས་དེའི་འོད་ཟེར་གྱི་ཕུང་པོ་ལྕགས་ཀྱུའི་རྣམ་པས་འཆད་པར་འགྱུར་བའི་བཅོམ་ལྡན་འདས་ཁ་དོག་དང་ཞལ་དང་ཕྱག་དང་གདན་དང་བཅས་པ་ བཀུག་སྟེ།མདུན་དུ་བསམ་པར་བྱའོ། །དེ་ལ་ཡིད་ལ་བྱ་བའི་མེ་ཏོག་དང་བདུག་པ་ལ་སོགས་པས་ཡང་དག་པར་མཆོད་དེ། མདུན་དུ་སྡིག་པ་བཤགས་པ་ལ་སོགས་པ་ཐམས་ཅད་བྱ་སྟེ། བྱམས་པ་ལ་སོགས་པ་ཚངས་པའི་གནས་བཞི་བསྒོམ་པར་བྱས་ལ། ཆོས་ཐམས་ཅད་ སྟོང་པ་ཉིད་མངོན་དུ་བྱས་ཏེ་སྔགས་འདིས་བྱིན་གྱིས་བརླབ་པར་བྱའོ།།ོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོུ྅ཧཾ། དེ་ནས་ནམ་མཁའ་ལ་ཧཱུཾ་ཡིག་ལས་རྡོ་རྗེ་རྩེ་ལྔ་པ་ས་བོན་དང་བཅས་པ་བསྒོམ་པར་བྱའོ། །དེའི་སྟེང་དུ་ཨ་ཡིག་ལ་ཟླ་བའི་དཀྱིལ་འཁོར། དེའི་འོད་ཟེར་ར ནམས་ཀྱིས་རྡོ་རྗེའི་ར་བ་དང་།རྡོ་རྗེའི་གུར་དང་། རྡོ་རྗེའི་རང་བཞིན་གྱི་ས་གཞི་གསེར་གྱི་ས་གཞི་ལ་ཐུག་པ་བསྒོམ་པར་བྱའོ། །རྡོ་རྗེ་ཡང་འོད་ཟེར་དུ་གྱུར་ནས་རྡོ་རྗེ་ར་བའི་ཕྱི་ངོས་སུ་ཕྱོགས་བཅིངས་པ་ལ་སོགས་པའི་གཟུགས་སུ་གནས་པར་བལྟའོ། །དེའི་རྗེས་ལ་རྡོ་རྗེ་ར་བའི་ནང་དུ་ཧྲཱིཿཡིག་ ལས་པདྨ་དེའི་སྟེང་དུ་ཨ་ཡིག་ལས་ཟླ་བའི་དཀྱིལ་འཁོར།དེའི་སྟེང་དུ་མུཿཡིག་དམར་སེར་སངས་རྒྱས་དཔག་ཏུ་མེད་པ་སྤྲོ་བ་དང་བསྡུ་བ་བྱེད་པར་བསམས་ལ། དེ་ཡོངས་སུ་གྱུར་པ་ལས་རྗེ་བཙུན་འཇམ་དཔལ་དམར་སེར་པདྨ་དང་ཟླ་བའི་སྟེང་དུ་རྡོ་རྗེའི་སྐྱིལ་མོ་ཀྲུང་གིས་བཞུགས་པ། ཤེས་ རབ་ཀྱི་པུསྟི་དང་རལ་གྲི་དང་གཞུ་དང་མདའ་འཛིན་པ་རིན་པོ་ཆེའི་དབུ་རྒྱན་ཅན།མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་བརྒྱན་པ། གཞོན་པ་གཞོན་ནུའི་རྒྱན་གྱིས་བརྒྱན་པར་བདག་ཉིད་བསམ་མོ། །སྙིང་གར་པདྨ་དང་ཟླ་བའི་སྟེང་དུ་སེམས་དཔའི་སྐྱིལ་མོ་ཀྲུང་ གིས་བཞུགས་པའི་རྡོ་རྗེ་སེམས་མ་དཀར་མོ་གཡོན་པས་དྲིལ་བུ་དཀུར་བརྟེན་པ།གཡས་པས་སྙིང་གར་བསྟོད་པའི་ཚུལ་གྱིས་རྡོ་རྗེ་འཛིན་པའོ། །དཔྲལ་བར་དེ་བཞིན་དུ་ཡང་དག་པར་གནས་པའི་རིན་ཆེན་རྡོ་རྗེ་སེམས་མ་སེར་མོ་ཕྱག་གཉིས་ཀྱིས་སྤྱི་བོར་མེ་ཏོག་གི་ཕྲེང་བ་འཆིང་བའོ། ། མགྲིན་པར་པདྨའི་རྡོ་རྗེ་མ་དམར་སེར་གཡོན་འགྱིང་བག་གི་ཚུལ་གྱིས་པདྨའི་རྩ་བ་འཛིན་པ། གཡས་ཀྱིས་དེའི་འདབ་མ་འབྱེད་པ་སྔར་བཞིན་དུ་གནས་པར་བལྟ་བར་བྱའོ། །སྤྱི་བོར་ལས་ཀྱི་རྡོ་རྗེ་མ་ལྗང་གུ་རྡོ་རྗེ་རྩེ་གསུམ་ལག་པ་གཉིས་ཀྱིས་སྤྱི་བོར་འཛིན་པ། དེ་བཞིན་དུ་ཡང་དག་པར་བསྒོམ་པར བྱའོ།།ོཾ་བཛྲ་ཨཾ་ཀུ་ཤ་ཛཿ། ཨོཾ་བཛྲ་པཱ་ཤ་ཧཱུཾ། ཨོཾ་བཛྲ་སྥོ་ཊ་བཾ། ཨོཾ་བཛྲ་ཨཱ་བེ+ེ་ཤ་ཧོཿ། ཞེས་བྱ་བ་འདི་རྣམས་ཀྱི་སྔགས་ཀྱིས་པདྨ་དང་ཟླ་བའི་སྟེང་དུ་གོ་རིམས་བཞིན་དུ་ཡེ་ཤེས་ཀྱི་དཀྱིལ་འཁོར་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱས་ཏེ། རྡོ་རྗེ་ཁུ་ཚུར་ བཅངས་ཏེ་མཛུབ་མོ་དང་མཐེའུ་ཆུང་གཉིས་ལྕགས་སྒྲོག་ཏུ་བྱས་ཏེ།རྡོ་རྗེ་འཁོར་ལོའི་ཕྱག་རྒྱ་སྤྲད་པ་གན་རྐྱལ་དུ་བྱས་པས་རང་གི་སྙིང་གར་བཞག་པས་ཡོན་ཆབ་དང་། ཞལ་བསིལ་དང་། མེ་ཏོག་དང་སྤོས་ལ་སོགས་པ་རྣམས་ཀྱིས་ཡང་དག་པར་མཆོད་ལ། དེ་མ་ཐག་ཏུ་རང་གི་ ལུས་ལ་གཞུག་པར་བྱའོ།།དེའི་རྗེས་ལ་དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བ་སྔོན་དུ་སོང་བས་བདག་ཉིད་ཀྱི་སྤྱི་བོར་མི་བསྐྱོད་པ་བསམས་ལ། ཨོཾ་སརྦྦ་དྷརྨྨ་ཨ་བྷཱ་བ་སྭ་བྷཱ་བ་བི་ཤུདྡྷེ་བཛྲ་ཨ་ཨཱ་ཨཾ་ཨཿ། པྲ་ཀྲྀ་ཏི་པ་རི་ཤུདྡྷ་སརྦ་དྷརྨཱ་ཡ་དུ་ཏ་སརྦ་ཏ་ཐཱ་ག་ཏ་ཛྙཱ་ན་ཀཱ་ཡ་མཉྫུ་ ཤྲཱི་པ་རི་ཤུདྡྷི་ཏཱ་མུ་པཱ་དཱ་ཡེ་ཏི་ཨ་ཨཱཿ།སརྦ་ཏ་ཐཱ་ག་ཏཱ་ཧྲི་ད་ཡ། ཧ་ར་ཧ་ར། ཨོཾ་ཧཱུཾ་ཧྲཱིཿབྷ་ག་བཱན་ཛྙཱ་ན་མཱུརྟི་བཱ་གཱི་ཤྭ་ར་མ་ཧཱ་ཝ་ཙ་སརྦ་དྷརྨྨཱ་ག་ག་ན་ཨ་མ་ལ་སུ་པ་རི་ཤུདྡྷ་དྷརྨྨ་དྷཱ་ཏུ་ཛྙཱ་ན་གརྦྷ་ཨཱཿ། ཞེས་པའི་སྔགས་འདིས་དང་པོ་དང་ཐ་མ་དང་དབུས་སུ་བྱིན་གྱིས་བརླབ་པ་སྔོན་དུ་སོང་བས། རྗེ་བཙུན་ ཡང་དག་པར་བརྗོད་པ་རྟག་ཏུ་ཐུན་མཚམས་སུ་ལན་གསུམ་མམ་དུ་མ་ཡང་རུང་།རྡོ་རྗེའི་སྐྱིལ་མོ་ཀྲུང་བཅས་ཏེ་མཉམ་པར་གཞག་པས་བཀླག་པར་བྱའོ། །འདི་ཇི་སྲིད་དུ་བཀླགས་པ་དེ་སྲིད་དུ་གྲུབ་པའི་མཚན་མ་རྣམས་མཐོང་ངོ་། །དེ་ལྟ་བས་ན་སྒྲུབ་ཐབས་ཉམས་སུ་བླང་བར་བྱའོ། ། མཚན་ཡང་དག་པར་བརྗོད་པའི་སྒྲུབ་ཐབས་རྫོགས་སོ།། །།དར་མ་གྲགས་ཀྱིས་རང་འགྱུར་བྱས། །དེ་ཡིས་བསོད་ནམས་གང་ཐོབ་དེས། །ཆོས་དབྱིངས་ངག་གི་དབང་ཕྱུག་གིས། །འགྲོ་བ་བྱིན་གྱིས་བརླབ་པར་ཤོག། །།